MA QABSOOMI DOONAA SHIRKA…?

    Shirka dib u heshiineed ee lagu wado inuu ka dhaco inuu ka haco dalka Kenya ayaa u muuqda mid rajadiisu ay sii yaraaneyso maalinba maalinta ka dambeeyso taasoo sabab u ah dawladaha safka hore oo isku haysta qaabkii loo qaban lahaa shirka.

Wafdigii ka socday guddigaas oo booqday dhowr meelood oo ay ka mid tahay Muqdisho ayaa intii aysan ka ambabixin Muqdisho waxay ay qabteen shir jaraa’id oo ay ku sheegeen in ay ku guuleeyseen safaradii ay ku soo kala bixiyeen dhowr meelood oo wadanka ka mid ah.

Markii ay yimaadeen Muqdisho waxa ay la kulmeen wasiirka warfaafifinta ee DKM & xubno ka tirsan mucaaradka oo uu ka mid yahay Muuse suudi, wasiirka ayaa ku canaantay wafdiga in ay ahayd  marka hore  inay yimaadaan Muqdisho halka ay ka aadeen meelo kale, wuxuu kaloo wasiirku uu ka dalbaday wafdiga in ay u cadeeyaan cida xaqa u leh & cida aan u lahayn ka qayb galka shirka, iyo sidoo kale in loo cadeeyo waxyaabihii ay kala soo hadleen dadkii ay la soo kulmeen.

“xaq ayaan u leenahay inaan ogaano cida xaqa u leh ka qayb galka shirka & cida aan u lahayn” ayuu yiri wasiirka oo intaa raaciyey in loo cadeeyo waxyaabihii ay ka soo wada hadleen wafdiga & dadkii ay kula soo kulmeen goboladii ay booqdeen.

 Hadaba is maandhaafka siyaasadeed ee Soomaaliya oo soo taagnaa 10 kii sano ee ugu dambeeysay welina aanay muuqan rajo wanaagsan & dawlad ay raali ka wada yihiin ragga isku haya masraxa siyaasadeed ee dalka ayaan la ogeyn meeshuu cago dhigan doono.

 Suaalaha ay dadweynaha is weydiinayaan ayaa waxa ay tahay ma qabsoomi doonaa marka hore shirka lagu wado inuu ka dhaco dalka Kenya? Dadweynaha aad bay u suluugsan yihiin shir dambe maxaa yeelay dhowr & labaatankii shir ee la qabtay waxba kama hagaagin, midkaan hada la sheegaayana waaba ka sii daran yahay kuwii hore oo waxaaba la isku haystaa qaabkii uu u dhici lahaa shirka oo la isku soo hor fariisan lahaa.

 Waxaan ilaahay ka baryeenaa inuu Soomaaliya quluubtooda isku keeno, fahamsiiyana waxa ay tahay dawlad & nabad, Ilaahayow umuuraheena uga wali yeel dadka wanaagsan oo ku xukuma diintaada, ha inooga wali yeelin daka xun xun ee jaahiliinta ah.

 ( يا رب ولي أمورنا خيارنا ولا تول أمورنا شرارنا-آمين –آمين –آمين (

 GOBOLKA BAY OO LOOGA DHAWAAQAY…

Waxaa Gobolka Bay shalay loooga dhawaaqay is maamul goboleed uu madaxweyne ka yahay Guddoomiyaha RRA Xasan Nuur Shaatigaduud. Ku dhawaaqida  is maamulka waxaa si weyn uga soo horjeestay una cambaareeysay Dawlada KMG oo iyadu wax awood ah ku lahayn wadanka gaar ahaan caasimada, C/qaasim & Cabdalla deeroow ayaa labada si weyn uga xumaaday ku dhawaaqidaas oo ay sheegen inay ka dambeeyso Itoobiya.

     Magaalada Baydhabo ayaa aad looga soo dhoweeyey ku dhawaaqidaan in kastoo ay jireen dad aan ku qanacsanayn arintaan, iyadoo dalkii la isku oran jiran Jamhuuriyadda Soomaaliya ay maanta aysan warkeeda jirin oo gobol kasta uu sameeystay is maamul  Iyadoo horay u jireen Somaliland & Puntland ayaa tana waxay ka dhigeysaa gobolkii sedexaad oo ku dhawaaqa is maamul.

    Soomaaliya oo 10 kii sano ee la soo dhaafay aysan ka jirin wax dawlad ah in kastoo sanadkii 2000 shirkii magaalada Carta lagu soo dhisay dawlad ku meel gaar ah hadana ma jirto waxa ay wadanka ku soo kordhisay oo la taaban karo hadii ay noqon lahayd dib u heshiisiin ama xagga nabadgelyada magaalada Muqdisho oo noqotay meel burcada ay ka taliso oo xoog ku leh.

 Haddaba ku dhawaaqidaan is maamulka ee Gobolka Baay waxay sii fogeyneysaa midnimadii & qaranimadii dalka, wadamada aduunka gaar ahaan reer galbeedka & maraykanka ayaa indhaha ka qabsaday arimaha Soomaaliya ka dib markii ay ku fashilmeen operationkii ay ugu magic dareen “Restore Hope”

 dhibaatada soomaaliya haysata waxaa ugu weyn iyadoo qabiil kasta ay isku haaystaan labo qabqable dagaal oo mid walbaa uu doonaayo inuu isagu noqdo madax, ayna jirin wax tanaasulaad ah oo ay u sameeynayaan dalka & dadka Soomaaliyeed ee dagaalada sokeeye ku baaba’ay.

 (FAQAY PRESS)

WAXAY ILA TAHAY IN SHIRKA SOO SOCDA LOOGA…

        Sida la filaayo waxaa magaalada Nairobi ee dalka Kenya ka dhacaayo shir dib u heshiisiin oo loo qabanaayo kooxaha isku haysta talada wadanka Hadaba dalalka lagu magacaabo safka hore oo kala ah Kenya, Eithopia iyo Djibouti ayaa wada dadaal ay doonayaan inay ku dhexdhexaadiyaan kooxaha loolanka xoogan uu ka dhaxeeyo kuwaas oo aan waxba isku ogoleen.

             Waxaa dhib weyn uu ka jiraa qaabka uu u qabsoomaayo shirka, maxaa yeelay kooxaha ka soo horjeeda dawlada KMG waxa ay doonayaan inaan cidina dawlad sheegan oo koox ahaan looga soo qayb galo taas oo ay ka biyo diideen dawlada.

 Waxaa sidoo kale jira khilaaf weyn oo u dhaxeeya dalalka shirka agaasimaya oo iyaga laftooda ku kala qaybsan qaabka uu u dhacaayo shirka, taas oo ka dhigi karta in gebi ahaanba uu burbur ku yimaado qabsoomida shirka.

Waxaan ku talin lahaa in shirku uu u dhaco qaab kooxeed oo meesha laga saaro wax dawlad ah waayo runta marka laga hadlayo Soomaaliya dawlad kama jirto oo wax ka qaban karta dhibaatada dalka & dadka Soomaaliyeed maanta haysata, qolooyinkaan dawlada isku sheegaayo waxaan kula talin lahaa inay eegaan dhibaatada haysata dadka Soomaaliyeed oo ay u tanaasulaan maadaama aysan meelna xukumin, 

C/qaasim waxaa la gudboon inuu is casilo oo uu eego dhibaatada bulshada haysata maadaama uu ku fashilmay inuu nabadgelyadii caasimada uu wax ka qabto Waxaa moodaa in Soomaalidu aysan lahayn masax wanaagsan oo qofkii hal mar xukun qabtaa uusan diyaar u ahayn inuu ka dego xukunka isagoo eegaaya dhibaatada haysata bulshada.

 Ma laga yaabaa C/qaasim meeshuu labo sano wax uu ku qaban waayey inuu hal sano ku qabto? Jawaabtu waa maya, ilama aha lagamana sugaayo inuu nabadgelyadii  uu ku celiyo Muqdishu Aaway axdigii dhaartii ee uu ku soo maray Carta? Waxyaabihii uu ku soo dhaartay midna kama fulinin, sidee buu ku sheegan karaa hadaba madaxweyne isagoo aanan wax awood ah ku lahayn caasimadii dalka?, waa in maskaxda ay inoo talisaa oo ay shaqeysaa halkii ay qoriga uu inoo talin lahaa, waqtigii kali talisnimada waa dhamaatay ee C/qaasimow ha isku marin jidkii macalinkaada uu maray ee Maxamed Siyaad .

(FAQAY PRESS)

TAARIIKHDA FAQAY DIINI & MANSABADDA AY…

          Somaaliya waxa ay caan ku ahayd ayna ku tahay weli culumo aqoon dheer u leh diinta islaamka, oo soo gaarsiiyey isla markaana baray dadka diinta.

            Hadaba culumadaasi waxaa ka mid ahaa reer Faqay diini oo fac ka fac ahaa dad culumo ah oo aqoon dheer u lahaa diinta islaamka, tusaale ahaan hadii aan u soo qaadano Sheekh Shuceyb wuxuu ahaa wadaad taqi ah oo aqoon dheer u lahaa diinta.

            Sheekh Shuceyb wuxuu ka dhashay qoys culumo ah wuxuuna ahaa daaci ugu yeera dadka diinta, wuxuu ahaa sheekh karaamo leh oo la sheegay inuu halkii weeso ama dahaaro uu ku dukan jiray shanta salaadood.

            Sheekh Shuceyb wuxuu safar uu ku yimid deegaano ka tirsan gobolka shabeelada dhexe isagoo daaci ah oo dadka baraaya diintooda, wuxuu markii dambe uu degay meel lagu magacaabo “Dhiilduug” oo wax yar laamiga dhanka galbeed kaga began, halkaas oo ayuu ka waday inuu dadka baro diinta, inay Ilaahay ka cabsadaan oo ay salaada ku dadaalaan.

            Wuxuu markii dambe uu si rasmi ah u aas-aasay tuulo lagu magacaabo “Jimeeco Macruuf” oo laamiga dhanka qorax ka soo bax kaga began, oo u dhow Jimeeco Misra Tuuladaas “Jimeeco macruuf” ilaa & iminka waa meel aad caan u ah, halkaan laguma soo koobi karo taarikhda Sheekh Shuceyb & waxa uu diinta u soo qabtay.

             Sheekh Bashiir oo isna ahaa wiilka sheekh Shuceyb ayaa kaalin aad u weyn ka soo qaatay diinta, wuxuuna ahaa sheekh taqi ah oo weliba aad deeqsi u ah, wuxuu aas-aasay tuulo lagu magacaabo “Jimeeco Sh. Bashiir” oo 30 km galbeed kaga began  magaalada Jowhar, tuuladaas ayaa ah mid caan ah oo aad looga yaqaano Soomaaliya.

             Sheekh Bashiir wuxuu dadka ugu yeeri jiray inay Alle ka baqaan oo salaada ku dadaalaan, waxayna dadka degan tuulada Jimeeco Sh. Bashiir ay yihiin dad wanaagsan oo ahlu salad ah,  waana dad beeraaleey ah oo xalaasha quuta.

 Jimeeco sh. Bashiir waxay dhisan tahay muddo ku dhow hal qarni, dadka degan tuuulada ilaa & iminka waa dad aan salaada marna ka tagin oo aad isugu xiran oo is kaalmeeya mar walba,  taas oo ay aad & aad kaga duwan tahay tuulooyinka kale ee ku yaala agagaarkeeda, taana waxay ku timid dadaalkii uu sameeyey Sheekh Bashiir & baridii uu dadka baray diinta, Ilaahay ha u naxariisto sh.Bashiir, sh. Shuceyb & dhamaan culumadii kaalinta weyn ka soo qaadatay diinta (Aamiin).

(FAQAY PRESS)

AYAAN DARAN (Sheeko) QAYBTII Koowaad

Asli waxa ay ahayd gabar qurux badan oo dabeecad wanaagsan, waxa ay dhigan jirtay dugsiga hoose dhexe ee Macalin Jaamac, waxay ahayd gabar aad & aad u jecel waxbarashada isla markaana dadka deriska ah ay aad u jeclaayeen dabeecadeeda & xilkasnimadeeda wallow ay ahayd gabar yar hadana waxa ay u fekeri jirtay sida qof weyn oo kale.

             Asli abaheeda waxaa la oran jiray Awjaamac wuxuu ahaa shaqaale dawladda u shaqeeya, hooyadeeda waxaa la oran jiray Cambaro, waxaa Asli la dhashay wiil & gabar, wiilka waa uu ka weynaa balse gabadha ayaa ka yareed, wiilka waxaa la oran jiray Cali Amuur wuxuuna ahaa macalimiintaa PP.

              Reerka oo idil aad bay u jeclaayeen Asli, aad ayaana loo qadarin jiray oo wax kasta oo ay rabto waa la siin jiray, walaalkeeda Cali Amuur aad buu u jeclaa Asli oo had & jeer wuxuu ku boorin jiray waxbarashada, wuxuuna u wadi  jiray magaalada oo uu u soo iibin jiray waxay doonto.

             Asli dugsiga waxay ku baratay gabar lagu magacaabo Canab, waxayna ahayd gabar ka da’ weyn Asli, balse waxa ay ahayd gabar anshax xun oo leh balwad, Canab waxay cuni jirtay qaadka wayna qiiqin jirtay sigaarka, waxay laheed Canab saaxiibo badan.

             Asli ma ahayn gabar balwad leh, waxayse aad u jecleed  filimada hindiga & riwaayadaha, maalin maalmaha ka mid ah ayaa Canab oo dhexmaraysa magaalada waxay la  kulantay mid ka mid ah saaxibadeeda oo la oran jiray Cali oo gaari kala jiidan wata, Cali waxaa gaariga la saarnaa saaxibkiisa Cadaawe, Cali &  Canab mar hore ayaa isugu dambeeysay intuu u gacan laadiyey ayuu gaarigii ku soo qaaday waxaana dhexmartay sheeko dheer.

             Cali markii uu ka wareeystay Canab xaaladeeda wuxuu u soo bandhigay inuu casumaayo habeen dambe, wuxuuna ka codsaday in ay horay u soo wadato saaxibteed, Canab ayaa tiri saaxibteey waa masaakiin aan laheeyn wax balwad ah umana maleynaayo inay iga ogalaan doonto balse waan isku dayayaa in… Cali ayaa ka dhex galay oo yiri canabeey intaa mid la hubin soo kaxeeyn laheed mid la hubo maad soo wadatid, Cadaawe oo sheekada la socday oo gaariga gadaal ka saarnaa ayaa la soo booday aniga waxaan doonayaa gabadha masaakiinta ah ee aan hadalka badneeyn ee Canab sheegtay.

             Canab oo ka argagaxday hadalka Cadaawe ayaa ku tiri oo maxaa ku sameeyneysaa gabadha, Cadaawe ayaa yiri Xaradheere xoog ayaa yaalo Xamarna xisaab ayaa taalo ee bal ii soo gacan geli gabartaas aad sheegaty anigaa aqaano sida loo liso gabdhaha masaakiinta ah oo hadalka yar ee…. La soco talaadada

 ±±±±±±±±±±±±±±±±±±±±±±±±±±±±±±±